Philippine Local Government Interactive Dataset

Ano ang Philippine Local Government Interactive Dataset project?

Simple lang ang mithiin ng Philippine Local Government Interactive Dataset Dashboard—ito ay ang pagtibayin ang bukas at responsableng lokal na pamamahala. Ang proyektong ito ay inisyatiba ng Program on Social and Political Change ng University of the Philippines Center for Integrative and Development Studies. Batid ng proyekto kung gaano kahirap kumuha ng datos tungkol sa mga pinuno at mga tagapagpasya sa ating pamahalaan. Dahil dito, nais ng proyekto na ilapit ang impormasyon sa mga mamamayan upang sila mismo ay masusing masuri ang performance ng kanilang mga halal na opisyal. Sa kabuuan, nais ng proyekto na maging matalino ang bawat Pilipino sa kanilang pakikilahok sa mga demokratikong proseso gaya ng pagboto.

Upang maisakatuparan ito, masusi kaming nangalap ng mga datos na may kinalaman sa eleksyon gaya ng kabuuang bilang ng boto ng kasalukuyang alkalde o gubernador, bilang ng mga kandidatong nagtunggali, kung matagal na bang nasa posisyon ang kandidato, at kung may kaanak ba syang tumtatakbo din sa pwesto. Ang mga datos ay hinango sa talaan o records ng Commission on Elections (COMELEC) at maingat na nilinis, inayos, at kasalukuyang biniberipika o sinusuri upang matiyak na wasto.

Sa Agham Pampulitika, may ilang mananaliksik na nagsasabing malaki ang papel ng kumpetisyong elektoral sa kaledad ng pagpapatakbo ng pamahalaan. Halimbawa, kung bagito ang halal na opisyal at gumagawa pa lamang ng pangalan, maaasahan ang mas maraming serbisyo para makakuha ng boto sa susunod na eleksyon. Isa sa mga pinakasimpleng batayan ay ang kaledad ng pananalapi ng mga lokal na pamahalaan. Bakit pananalapi? Una, sa ilalim kasi ng Saligang Batas at ng Local Government Code, binibigyan ang mga lokal na yunit ng kalayaang gumasta at lumikha ng kani-kanilang pagkukunan ng pondo (fiscal autonomy). Ikalawa, mahuhusgahan ang kaledad ng pamumuno sa husay ng lokal na pamahalaang lumikha ng pagkukunan ng pondo. Dahil dito nangalap din kami ng mga datos sa lokal na pananalapi mula s Bureau of Local Government Finance. Ang kabuuang haba ng datos ay mula 1992 o mula nagging batas ang Local Government Code, hanggang taong 2022.

Pangunahing layunin ng proyekto ang mga sumusunod:

1. Makalikom ng datos
   Layunin ng proyektong ipunin ang mga datos na may kinalaman sa mga nanunungkulan gaya ng kanilang nakuhang boto at init ng kumpetisyon noong eleksyon na kanilang naipanalo. Kasabay nito ang pagkalap ng datos tungkol sa pananalapi ng lokal na pamahalaan bilang proxy o sukat ng kalidad ng pamamalakad.
2. Interactive na platform
   Layunin ng dashboard na magamit para sa mabilisang paggawa ng mga talaan, graphs at charts tungkol sa eleksyon at lokal na badyet. Gamit ang mga nasabing visual tools, madaling mauunawaan ng mga mamamayan ang lagay ng kanilang lungsod o lalawigan. Hindi nila kailangan umasa sa eksperto.
3. Mga puna o insight
   Ang dashboard ay tool para magkaroon ng ideya sa performance ng lokal na pamahalaan sa pamumuno ng kanilang mga hinalal na opisyal. Maaring gawin ang analysis sa dalawang antas. Una, sa pamamagitan ng dashboard pagkatapos ma-input ang ilang mahahalagang detalye. Pangalawa, para sa mga akademiko at mananaliksik, sa pamamagitan ng pagdownload ng mga datasets at pagproseso sa mga ito gamit ang statistical package (e.g., Stata, o R).
4. Access sa Dataset
   Libre ang dataset at walang limitasyon ang access sa dashboard. Subalit sa kasalukuyan, limitado lamang ito sa iilang posisyon sa lokal na pamahalaan dahil patuloy ang pagdevelop, checking, at update ng mga datos.
5. Feedback
   Kailangan naming hindi lamang ang inyong pagtangkilik kundi pati puna. Habang nasa beta version pa lamang ang dashboard, inaanyayahan naming tulungan kaming i-validate ang datos. Kung gusto naman ninyo ang ideya ng proyekto, tulungan ninyo kaming ipakalat ito para lubusang mapakinabangan ng ating mga mamamayan.

Sa kabuuan, hangad naming ang istilo ng paggawa ng polisiya batay sa ebidensya at adbokasiya o evidence-based policymaking. Sa pamamagitan ng mga datos, naniniwala kaming makakahikayat kami ng mas matalinong pagpili sa panig ng mga botante. Sa huli, layunin ng proyekto na palakasin ang ating pagkamamamayan upang mas aktibong makibahagi ang lahat sa pagpapabuti ng ating mga komunidad.